ថ្ងៃពុធ ៦កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣ ខែសីហា ឆ្នាំ២០២២
វិទ្យាស្ថានពហុបច្ចេកទេសភូមិភាគតេជោសែនតាកែវ បានរៀបចំពិធីបើកវគ្គបណ្តុះបណ្តាលស្តីពីការឆ្ពោះទៅរកការសម្រេចបានការរស់នៅប្រកបដោយសុខសន្តិភាពនៅអាស៊ី ក្រោមប្រធានបទ «ការសិក្សាអប់រំបណ្តះបណ្តាលបច្ចេកទេស និងវិជ្ជាជីវៈ»។ វគ្គបណ្តុះបណ្តាលនេះ ឧបត្ថម្ភគាំទ្រដោយគម្រោងមូលនិធិ Eurasia Foundation (From Asia), Tokyo, Japan។
ពិធីនេះ ស្ថិតក្រោមអធិបតីភាព ឯកឧត្តមបណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ ដោយមានការអញ្ជើញចូលរួមពីសំណាក់ អគ្គនាយករង ប្រធាននាយកដ្ឋាន អនុប្រធាននាយកដ្ឋាន អនុប្រធានមន្ទីរ អ្នកសម្របសម្រួលគម្រោងមូលនិធិ Eurasia មន្រ្តីរាជការ សាស្រ្តាចារ្យ យុវជនក្រុម១៨ យុវជន ស.ស.យ.ក ព្រមទាំងសិស្សនិស្សិត សរុបចំនួន ១៧០នាក់។
ឆ្លៀតក្នុងឱកាសដ៏វិសេសវិសាលនោះដែរ ឯកឧត្តបណ្ឌិត ក៏បានផ្តាំផ្ញើរ និងផ្តល់អនុសាសន៍៖
វិទ្យាស្ថានពហុបច្ចេកទេសភូមិភាគតេជោសែនតាកែវ
- បន្តធ្វើការជ្រើសរើសសិស្សចុះឈ្មោះចូលរៀនកម្មវិធីនេះឱ្យបានតាមគម្រោងកំណត់
- ពង្រឹងគុណភាពការអប់រំបណ្តុះបណ្តាលបច្ចេកទេស និងវិជ្ជាជីវៈ
- បង្កើន និងពង្រឹងកិច្ចសហការរវាងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ និងវិស័យឯកជន ដើម្បីរៀបចំការចុះកម្មសិក្សា និងផ្តល់ឱកាសការងារដល់សិស្ស និស្សិតទាំងអស់ដែលកំពុងសិក្សានៅវិទ្យាស្ថាន
- បង្កើនការស្រាវជ្រាវ និងនវានុវត្តន៍ការអប់រំបណ្តុះបណ្តាលបច្ចេកទេស និងវិជ្ជាជីវៈនៅតាមគ្រឹះស្ថានរបស់ខ្លួន។
សិក្ខាកាម
- ត្រូវខិតខំយកចិត្តទុកដាក់ក្នុងការសិក្សា និងអនុវត្តការងារជាក់ស្តែងតាមការណែនាំរបស់សាស្រ្តាចារ្យ
- ត្រូវមានសីលធម៌ល្អនិងការទទួលខុសត្រូវក្នុងកិច្ចការងាររបស់ខ្លួន
- ត្រូវត្រៀមខ្លួនចូលក្នុងពិភពការងារ ឬបង្កើតមុខរបរដោយខ្លួនឯង
- ត្រូវត្រៀមខ្លួនជាធនធាន ដើម្បីចូលរួមអភិវឌ្ឍសង្គម សេដ្ឋកិច្ចជាតិ
- យុវជន១នាក់ ត្រូវមានជំនាញមួយយ៉ាងតិចប្រចាំជីវិត
យើងខ្ញុំទាំងអស់គ្នា ជាថ្នាក់ដឹកនាំ មន្រ្តីរាជការ សាស្រ្តាចារ្យ ព្រមទាំងសិស្សនិស្សិត សូមគោរពថ្លែងអំគុណយ៉ាងជ្រាលជ្រៅបំពោះវត្តមានដ៏ខ្ពង់ខ្ពស់របស់ឯកឧត្តមបណ្ឌិត ប្រតិភូរាជរដ្ឋាភិបាលដែលបានចំណាយពេលវេលាដ៏មានតម្លៃអញ្ជើញចូលរូមជាអធិបតីក្នុងពិធីបើកវគ្គបណ្តុះបណ្តាល និងបានផ្តល់អនុសាសន៍ល្អៗ ប្រកបដោយអត្ថន័យ យើងខ្ញុំទាំងអស់គ្នានឹងខិតខំប្រឹងប្រែងអនុវត្តន៍ឲ្យបានល្អបំផុត។
សូមគោរពជូនពរ ឯកឧត្តមបណ្ឌិត ប្រតិភូរាជរដ្ឋាភិបាល ទទួលបានពុទ្ធពរទាំង ៤ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លៀតឡើយ????????????❤️❤️❤️។
